Hér sést lítill farvegur sem skerst inn í ung hraunleg á stað sem mikil flóð hafa orðið á tiltölulega nýlega. Á svæðinu sem nefnist Athabasca Valles er víðfemt hraun, líklega hið yngsta á Mars, og jafnvel enn yngri vatnssorfnir farvegir. Talið er að rekja megi vatnsflauminn til Cerberus Fossae dalanna til norðurs en þeir gætu hafa gengið inn í vatnsveiti.

Í dag eru það þyngdarkrafturinn, vindur og frost sem hægt og bítandi brjóta niður brúnir farvegsins. Á myndinni sjáum við dökkleitt efni við brún farvegsins (úrklippa) sem líklega hefur opnast við rofið. Dökku efnin eru ekki eins rauð og yfirborðið í kring og sýnast því blá á þessari ýktu litmynd. Á nærmynd sjást gárur í dökka efninu sem bendir til að það sé úr sandi. Hugsanlega á sandurinn rætur að rekja annars staðar frá og að hann hafi einfaldlega safnast fyrir þar sem hann er í dag. Sú staðreynd að okkur hefur ekki tekist að finna sand annars staðar á svæðinu bendir til að það sé að veðrast úr hraunlögunum við brún farvegsins.

Mikilvægt er að finna uppruna sandsins því hreyfanleg sandkorn endast ekki ýkja lengi og brotna niður þegar þau rekast á yfirborðið. Veðrun og rof eldfjallaefnis á svæðinu gæti verið uppruni þessa sands en fáar slíkar sandlindir hafa fundist á Mars hingað til.

Þýðing: Sævar Helgi Bragason