Ekki segja dómurum FIFA það en í þessu tilviki er gott að vera rangstæður.

HiRISE tók þessa mynd þann 27. júní 2014, þegar Curiosity var rétt nýfarinn yfir jaðar 3-sigma lendingarsporvölunnar (bláa línan er jaðar sporvölunnar). Ok, ég heyri lítið um fagnaðarlæti enn sem komið er, svo þú spyrð eflaust „hvað í fjáranum er 3-sigma lendingarsporvala?“

Svarið er tölfræðileg spá um hvar á Mars jeppinn gæti lent, með tilliti til óvissuþátta eins og aðstæðna í lofthjúpi við komuna og lendingu. „3-sigma“ þýðir „3 staðalfrávik“ svo mjög líklegt (99% líkur) var að jeppinn kæmi niður einhvers staðar innan sporvölunnar.

Við val á lendingarstöðum eru 3-sigma sporvölur grannskoðaðar, því ekki viljum við lenda á neinu hættulegu eins og hnullungum eða bergsyllum innan sporvölunnar. Þess vegna reyndi MSL ekki að lenda við rætur Sharpfjalls, þar sem áhugaverðustu svæðin eru (úr geimnum séð) og varði næstum einu Marsári í að aka um (og kanna) uns hann komst að jaðri sporvölunnar.

Kannski fagna ákafir stuðningsmenn lendingarsvæðisins núna? Prófum þetta: Nú þegar MSL er kominn út fyrir öruggu lendingarsporvöluna verður landslagið áhugaverðara. Jeppinn getur ekið í kringum landslagsmyndanir sem hefði verið of hættulegt að lenda á. Á næsta Marsári verður bæði útsýnið og jarðfræðin áhugaverðari. Í suðurátt á HiRISE myndinni sést enda það sem koma skal: Fullt af klettaveggjum og sandöldusvæði.

Þýðing: Sævar Helgi Bragason