Þessi nýlega mynd er sú fimmta sem við höfum tekið af þessum sama stað á Mars. Við endurtökum gjarnan myndir af ýmsum stöðum á yfirborðinu til að fylgjast með breytingum í landslaginnu, ef einhverjar eru, vegna ýmissa ferla, til að mynda færslu sandalda.

Í þessu tilviki hafa engar breytingar komið fram, þótt nákvæmari samanburður á myndum gæti leitt eitthvað í ljós. Þess vegna höfum við tekið myndirnar frá ýmsum sjónarhornum og við ýmis birtuskilyrði, í tilraun til að draga fram nýjar upplýsingar sem eru á mörkum hins greinanlega. Þetta má gera með því að útbúa þrívíðar myndir af svæðinu við mismunandi birtuskilyrði og frá mismunandi sjónarhornum og, eftir að hafa hornaleiðrétt myndirnar, með því að skeyta þeim saman í eina mynd í „ofur-upplausn“. (Hornaleiðréttingin sýnir hvernig halli yfirborðsins birtist okkur úr lofti).

Þessar slóðir eru einnig hluti af mögulegum lendingarstað Beagle 2 kannans, byggt á mynd frá Mars Global Surveyor. HiRISE hefur tekið 24 aðrar myndir sem ná yfir stærstan hluta fyrirhugaðs lendingarsvæðis Beagle 2, en engin ummerki um kannann hafa fundist hingað til.

Þýðing: Sævar Helgi Bragason