Þennan gíg er að finna á Meridiani Planum, um 20 kílómetrum norðvestan við staðinn sem Opportunity jeppinn lenti á árið 2004 (og um 42 kílómetrum norðvestur af brún Endeavour gígsins, þar sem jeppinn hefur verið að störfum undanfarin ár). Þótt gígurinn sé í gagnstæða átt við jeppann er hann samt sem áður mjög áhugaverður.

Gígurinn er 4 km í þvermál og því stærsti gígurinn á svæðinu fyrir utan Endeavour gíginn (22 km). Hann er líka rétt rúmlega 5 sinnum stærri en Victoria gígurinn (0,75 km) sem Opportunity varði næstum tveimur árum í að rannsaka milli 2006 og 2008 (berðu saman við TRA_000873_1780).

Hvers vegna er gígurinn áhugaverður? Hann er mun eldri en Victoria gígurinn. Berðu til dæmis saman slétta brún gígsins við grófari og brún Victoria gígsins, sem er að veðrast. Öfugt við Victoria gíginn inniheldur þessi gígur mun meira af seti og brún hans er sléttari vegna rofs. Þrátt fyrir aldurs- og stærðarmun hafa gígarnir tveir og aðrir gígar á Meridiani Planum mun meira sameiginlegt. Við brúnir beggja eru bergopnur, svæði með ljósum sandsköflum á gígbotninum og dökkur sandur sem hefur safnast saman við innri norðurbrúnina og nær til norðvesturs á slétturnar í kringum gíginn.

Þýðing: Sævar Helgi Bragason