Á Mars eru sandöldur gjarnan að finna ofan í gígum. Fyrir vikið vaknar spurningin: Hvort myndast öldurnar úr sandi í gígunum eða eru gígarnir einfaldlega gildrur fyrir öldur á hreyfingu?

Hér sést fjöldi dökkleitra sandalda í og við nokkra gíga á fremur stórskornu landslagi Terra Cimmeria. Með því að skoða staðsetningu skriðhorna þessara sandalda getum við séð að þær eru að færast í suðurátt.

Þessi átt, miðað við staðbundið landslag, bendir til að sandöldurnar hér hafi færst inn og út úr gígnum á leið þeirra suður á bóginn. Smærri sandblettir virðast fastir í lægðum þar sem vindur nær ekki að feykja þeim upp, svo til verða sandgildrur.

Hér hefur HiRISE sýnt fram á að gígar á Mars geta bæði gómað sandöldur á sama tíma og þær geta losnað úr þeim.

Þýðing: Sævar Helgi Bragason