Melas Chasma er hluti af Valles Marineris gljúfrakerfinu, stærstu gljúfrum sólkerfisins. Nýlega var sú hugmynd sett fram að Melas Chasma gæti hafa orðið til við árekstur. Til að prófa tilgátuna hefur HiRISE tekið myndir af litlum misgengi á svæðinu, eins og þau sem sjást á myndinni.

Á myndinni eru raunar þrjú misgengi. Myndanirnar tvær sem minna á skurði eru sigdalir en þeir verða til þegar tognun verður á yfirborðinu svo það hrynur. Þriðja msigengið er hlykkjótti hryggurinn sem skerst í gegnum báða sigdalina. Þessi gerð er stundum kölluð „krumphryggur“ en þeir verða til þegar yfirborðsberg þrýstir á annað yfirborðsberg svo það leggst saman og þrýstist ofan á hitt. Á svæðinu hefur því bæði orðið tognun í norður-suðurátt og samþjöppun í austur-vesturátt.

Með nógu mörgum HiRISE myndum vonast vísindamenn til að setja saman sögu svæðisins og svipta hulunni af uppruna einnar glæsilegustu jarðmyndunarinnar á Mars.

Þýðing: Sævar Helgi Bragason

númer: ESP_034883_1645
dagsetning myndatöku: 04. janúar 2014
hæð yfir sjávarmáli: 256 km

https://uahirise.org/hipod/is/ESP_034883_1645
NASA/JPL-Caltech/University of Arizona
#Mars #NASA #Icelandic #íslenska