Á þessari mynd sést áhugavert ljóst set á Syria Planum, hálendu svæði við hæsta punkt Þarsis bungunnar.

Saga breytinga á yfirborði Syria Planum hefur verið skrásett með sjónaukum og brautarförum frá tímum Viking geimfaranna. Yfirborðsbreytingarnar eru komnar til af stöðugri setmyndun og rofi, þegar ljósleitt rykið fýkur með vindum sem blása frá norðri til suðurs meðfram dökku og grýttu yfirborðinu.

Sumstaðar hafa þykk ryklög safnast saman en þau má greina á innrauðum mælingum THEMIS á næturnar. Í gögnunum eru ryklögin kaldari (dekkri) en bergið á yfirborðinu, bæði á daginn og næturnar. HiRISE var beint að einum kuldablettinum til að kanna víxlverkun ryksins og landslagsins.

Þegar myndin er skoðuð sést að rykið hefur safnast saman í röð sprunginna hryggja, með um það bil 50 metra millibili og eru tugir til hundruð metrar að lengd. Ryk sest meðfram brún árekstragígsins en efnissletturnar frá gígnum eru óvenju ryksnauðar.

Í fullri upplausn eru hryggirnir augljóslega ólíkir sandöldum og ljósleitum sköflum sem eru algengir annars staðar á Mars. Brattari hlíðar þeirra eru gegnt sandöldnum, vindmegin, en kambar hryggjanna eru þannig útlits að vindur er augljóslega að sverfa þá. Í setinu sést fínt lag sem gæti bent til setmyndunar ryks og sands til skiptis.

Setmyndanir eins og þessar segja okkur að þótt að á Mars sé í dag tiltölulega mildur, hafi sterkari vindar verið ríkjandi tiltölulega nýlega, hugsanleg þegar möndulhallinn var mikill.

Þýðing: Sævar Helgi Bragason


númer: ESP_032735_1680
dagsetning myndatöku: 21. júlí 2013
hæð yfir sjávarmáli: 252 km

https://uahirise.org/hipod/is/ESP_032735_1680
NASA/JPL-Caltech/UArizona
#Mars #NASA #Icelandic #íslenska

twitter  •  tumblr