Á ljósmynd MOC myndavélarinnar af þessu svæði, sést farvegur sem liggur út frá Athabasca Vallis (í austur-vestur stefnu á norðurenda þessarar myndar) og stefnir í suður.

Farvegurinn klofnar í marga ála og myndar um það bil tíu straumlínulagaða stapa. Á mynd MOC sáust óljós merki um ójöfnur á botni farvegsins — hugsanlega hnullungar sem flóðvatnið hreif með sér?

HiRISE myndin okkar sýnir að ójöfnurnar eru gervigígar sem myndast við samspil vatns og hrauns. Svo virðist sem allur farvegurinn sé þakinn hrauni. Settar hafa verið fram tvær tilgátur til að skýra myndun þessara farvega: (1) Þeir eru vatns- og hraunsorfnir eða (2) hraunið sjálft svarf farveginn. Hafi hraunið valdið rofinu, þarf engu að síður vatn til að útskýra gervigígana en það gæti hafa verið í miklu minna magni en þarf til að sverfa farveginn.

Þýðing: Sævar Helgi Bragason

númer: ESP_029864_1880
dagsetning myndatöku: 09. desember 2012
hæð yfir sjávarmáli: 275 km

https://uahirise.org/hipod/is/ESP_029864_1880
NASA/JPL-Caltech/UArizona
#Mars #NASA #Icelandic #íslenska

twitter  •  tumblr