Á þessari mynd sést suðurhluti sandöldusvæðis í Nereidum Montes en þar fylgjast menn með útlitsbreytingum á sandöldunum.

Margar af þessum sandöldum sitja á bröttum hlíðum. Hlíðarnar halla í suðurátt en öldurnar vaxa upp á við til norðurs, sem sést af því að varhliðar þeirra liggja í norðurátt. „Klifuröldur“ eins og þessar hafa fundist víðar á Mars, til að mynda í Valles Marineris, en í þessu tilviki bera þær merki um tiltölulega sterka sunnanvinda.

Nærmynd sýnir varhlið einnar sandöldunnar. Að auki sjást nokkur trog sem virðast vera af völdum skriða, líklega þegar sandur rann niður hlíðarnar. Vindurinn blæs hluta sandsins burt og myndar rísandi gárur innan troganna. Þessi mynd sem og fleiri frá HiRISE sýna samspil vinds og þyngdarkrafts, tvö af mörgum landmótunarferlum sem eiga sér stað á Mars í dag.

(Ath.: Hér má sjá ómerkta útgáfu af nærmyndinni með kvarða).

Þýðing: Sævar Helgi Bragason

númer: ESP_029608_1390
dagsetning myndatöku: 19. nóvember 2012
hæð yfir sjávarmáli: 255 km

https://uahirise.org/hipod/is/ESP_029608_1390
NASA/JPL-Caltech/University of Arizona
#Mars #NASA #Icelandic #íslenska