Þessi mynd nær yfir lítinn hluta hinnar víðfeðmu norðursléttu á Mars á svæði sem kallast Utopia Planitia.

Á nærmyndinni, sem er í lit, sjáum við margar grunnar dældir sem í raun eru tvöfaldar. Í kringum innri og lægri hringlaga svæðin er grynnri hálfhringadæld. Sólarljós kemur inn frá neðri vinstri hliðinni (suðvestri) svo ef þú sérð bungur en ekki gíga er heilinn að snúa landslaginu við.

Hvernig urðu þessar tvöföldu dældir til? Ein hugmyndin er sú að innri dældirnar séu í raun árekstrargígar eða botnfall á gígbotninum. Þetta eru líklega aukagígar sem allir urðu til á sama tíma úr útkasti efnis frá mun stærri gíg. Vitað er að svæði á háum breiddargráðum á Mars eru rík af vatnsís grunnt undir þunnu jarðvegslagi. Þurra lagið ver ísinn sem annars myndi þurrgufa (fara beint úr föstu í gas) og hverfa.

Hvað gerist eftir að árekstur brýst í gegnum þurra lagið og leiðir ísinn í ljós? Ísinn myndi þurrgufa og ef hann fyllir ekki porurnar í jarðveginum, hrynur yfirborðið í kjölfarið. Ef til vill étur þurrgufunin burt ís í grunni lagi undir yfirborðinu í kringum hvern gíg og myndar þessar tvöföldu dældir eða „teygða gíga“.

Þýðing: Sævar Helgi Bragason

númer: ESP_028688_2330
dagsetning myndatöku: 08. september 2012
hæð yfir sjávarmáli: 306 km

https://uahirise.org/hipod/is/ESP_028688_2330
NASA/JPL-Caltech/UArizona
#Mars #NASA #Icelandic #íslenska

twitter  •  tumblr