Hér sést gígur á botni Eos Chasma sem er hluti af Valles Marinernis gljúfurkerfinu. Gígarnir á Mars eru jarðfræðingum gagnlegir því þeir sýna þverskurð af jarðlögunum undir yfirborðinu. Á suðurvegg gígsins sjást vísbendingar um nokkrar mismunandi gerðir bergs í mismunandi lit.

Útskurðurinn er úr mynd þar sem litirnir hafa verið ýktir. Á svarthvítu hlutum myndarinnar virðist sem hér sé tvenns konar berg að finna: Annað tiltölulega ljósleitt en hitt dökkleitt. Á 1,1 kílómetra breiðu litmyndinni sjáum við að dökka bergið er mun flóknara því sumt er grænleitt og annað fjólublátt.

Athugaðu að þetta eru ekki þeir litir sem augun mundu nema ef þú stæðir á plánetunni! Litirnir hafa verið ýktir þannig að nær-innrauð gögn sýnast rauð, rauð gögn eru grænleit og blágræn gögn blá. Allt þetta gerir okkur kleyft að afla meiri upplýsinga um staðinn.

Þýðing: Sævar Helgi Bragason