Hlíðarrákir eru algengar á hitabeltissvæðum Mars. Eitt sinn var talið að þær mynduðust af völdum rennandi vatns en í dag er álitið að þær séu rykskriður. Rákirnar eru iðulega dekkri en landslagið í kring og dreifa gjarnan úr sér undanhalla. Það bendir til þess að ryksetið sé klístrað svo skriðan breiðir úr sér þegar hún flæðir niður hlíðina.

Vitað er að hlíðarrákir dofna með tímanum en rákirnar sem hér sjást á Arabia Terra eru öðruvísi. Hér virðast gamlar rákir vera ljósleitari en landslagið í kring. Samanburður á myndum sem HiRISE tók árin 2008 og 2019 sýna mjög litlar breytingar á dökku og ljósu rákunum.

Við sjáum þrjár nýjar dökkar rákir á nýjustu myndunum okkar. Það voru einu breytingarnar sem sáust á meðal þeirra mörg hundruð ráka sem fylgst var með og bendir til þess að nýmyndun ráka og dofnunin taki nokkra áratugi að minnsta kosti.

Þýðing: Sævar Helgi Bragason