Sanöldur á Mars eru vinsælt rannsóknarefni af ýmsum ástæðum. Nýlegar rannsóknir hafa einkum beinst að því hvernig sandöldur og gárur færast.

Á þessari mynd sjáum við sandöldur í gíg í Noachis Terra. Þegar við þysjum inn að einu þessara svæða, koma í ljós jaðrar tveggja alda sem gárur og grjót skilja í sundur. Við getum borið þetta svæði saman við aðra mynd sem tekin var fyrir tveimur Marsárum. Á eldri myndinni sést aragrúi dökkra ráka á öldunum. Þetta eru slóðir eftir sandstróka sem myndast þegar hvirfilvindar þyrla þunnu ryklagi upp af yfirborðinu og leiða í ljós dekkra undirlag.

Að auki sjást dökkar sandrákir sem liggja í vestur frá eystri öldunni. Samanburður á myndunum sýnir að næstum allar slóðir sandstrókanna og dökku rákirnar hafa horfið síðastliðin tvö Marsár. Fátt er eftir sem bendir til þess að sandöldurnar og gárurnar hafi færst (myndirnar hafa þó ekki verið unnar sérstaklega til nákvæmari greiningar).

Líklega legst ryk regulega yfir svæðið og fýkur svo burt af öldunum. Rykið gæti komið í veg fyrir að öldurnar og gárurnar færist mikið svo þær breytingar sem við sjáum, eru aðeins tilkomnar þegar þunnu ryklögin fjúka burt af öldunum og minniháttar sandrákir myndast.

Þýðing: Sævar Helgi Bragason