Mars Science Laboratory jeppi NASA seig mjúklega niður á yfirborð Mars tjóðraður við eldflaugaknúinn krana. Um leið og jeppinn snerti yfirborðið, sprungu boltar sem losuðu tjóðrið frá honum.

Eldflaugakraninn hallaðist síðan 45 gráður og flaug burt uns hann varð eldsneytislaus en á þeim tímapunkti brotlenti hann á Mars. Nærmyndin sem hér sést sýnir hvart kraninn brotlenti en hann stefndi nokkurn veginn í norðausturátt. Við áreksturinn þyrlaðist upp ljóst ryk svo í ljós kom dekkra berglag undir. Þetta var engin smá árekstur.

Innan og við enda dökku rákanna sjást litlir hvítir deplar sem eru hugsanlega brak úr krananum. Þetta brak sést á myndinni og innfeldu myndinni (örvarnar benda á það).

Skáhallandi mynd af Sharpfjalli í Gale gígnum
Þessi mynd var tekin sólarhring eftir að MSL lenti svo hægt væri að staðsetja jeppann á yfirborðinu.

Litaræman náði ekki yfir vélbúnaðinn en í staðinn náðist þessi glæsilega skáhallandi mynd af „Sharpfjalli“ (Aeolis Mons) í miðjunni.

Sjónarhornið er 45 gráður, svipað og ef maður horfði út um glugga á flugvél. Nærmyndinni hefur verið snúið 90 gráður til að þetta sjónarhorn fáist.

Þýðing: Sævar Helgi Bragason